Беларуская Нацыянальная Памяць

План мерапрыемстваў БНП на 2012 год

2012-01-25T08:59:00.002+03:00

Рада БНП на сваім паседжаньні зацьвердзіла папярэдні план правядзеньня ды ўдзелу ў беларускіх мерапрыемствах у 2012 годзе.

4 лютага - лыжны рэйд памяці Кастуся Каліноўскага (Баброўнікі - Мастаўляны)

21 лютага - беларуская дыктоўка (Міжнародны дзень роднай мовы)

24 сакавіка - дзень памяці Кастуся Каліноўскага (Вільня)

25 сакавіка - сьвяточная акцыя на Дзень Волі

красавік - успамін памерлых продкаў (Радаўніца)

12 траўня - рэйд на роварах памяці Станіслава Булак-Балаховіча (Варшава)

10 чэрвеня - рэйд на роварах памяці Язэпа Булак-Балаховіча (Гайнаўка-Белавежа)

8 верасьня - шэсьце ў гонар Дня беларускай вайсковай славы (Варшава)

27 кастрычніка - Дзень памяці паўстанцаў 1863 году (Сьвіслач)

2 лістапада 2012 - Дзяды

27 лістапада 2012 - сьвяточная акцыя на Дзень герояў

86 гадавіна з дня народзінаў Янкі Філістовіча

2012-01-13T02:11:00.003+03:00

На 14 студзеня прыпадае 86 гадавіна з дня народзінаў Янкі Філістовіча. Традыцыйна ў гэты дзень сябрына БНП наведвае родную сястру Янкі спадарыню Серафіму Філістовіч.

Запрашаем усіх жадаючых далучыцца. У суботу выезд з Варшавы ў Гданьск. У Гданьску заплянавана таксама сустрэча з беларускай грамадой і ўдзел у вечарыне арганізаванай Беларускім культурным таварыства “Хатка”.

Запрашаем жадаючых!

З Калядамі і Новым годам!

2011-12-27T23:01:00.000+03:00

Шаноўныя сябры!

Віншуем Вас з Калядамі і надыходзячым Новым годам!

Жадаем Божай ласкі ў Вашыя сем'і, спакою, цярпеньня, цуда на Каляды!

Зварот з нагоды ўгодкаў Слуцкага збройнага чыну

2011-11-26T19:29:00.003+03:00

Беларусы!

Яны змагаліся за свабоду сваю і Айчыны! Яны не чакалі ні ад каго дапамогі! Яны самыя вырашалі свой лёс! Яны паклалі свае жыцьці за Беларусь, за нас, за цябе!

Дзевяноста адзін год таму, 27 лістапада 1920 году, распачаўся Слуцкі Збройны Чын. Нашы продкі выступілі на змаганне за сваю дзяржаву – Беларускую Народную Рэспубліку. У бой рушылі Слуцкі і Грозаўскі палкі Першай Слуцкай Брыгады Стралкоў БНР. Да іх далучыліся беларускія часткі арміі Генерала Станіслава Булак-Балаховіча, якія раней біліся пад Мазыром - Беластоцкі батальён і Смаленскі полк, а таксама партызанскія атрады «Зялёнага Дуба».

Некалькі тысяч паўстанцаў на працягу месяца давалі адпор бальшавіцкай навале. Апошнія атрады сышлі з поля бітвы толькі ў студзені 1921 году. Партызанскія атрады прадаўжалі змаганьне яшчэ некалькі гадоў.

Свая Рэспубліка нараджалася ў крывавых муках, але наш беларускі родны дух, які тады ажыў, не згасаў. На поле бітвы ў след за случакамі выходзілі наступныя пакаленьні змагароў за Беларусь.

27 лістапада – іхны дзень: Дзень Герояў. Таму ў заклікаем усіх, хто носіць імя беларуса, годна сьвяткаваць гэты Дзень, успамінаць нашых Герояў і штогод ставіць у акне сьвечку. Няхай яе агенчык сігналіць Змагарам, што ў гэтай хаце помняць іх Чын.

Жыве Беларусь!

Алесь Краўцэвіч, Беларускае Гістарычнае Таварыства
Алег Латышонак, Беларускае Гістарычнае Таварыства ў Польшчы
Анатоль Міхнавец, Беларуская Нацыянальная Памяць

БНП ушанавала памяць беларусаў, якія пахаваны ў Варшаве

2011-11-03T00:37:00.004+03:00

Рэпартаж грамадска-палітычнай сацыяльнай сеткі INTERPOLIT

Рэпартаж Радыё "Рацыя"

Рэпартаж Эўрарадыё

Сустрэча з Зянонам Пазьняком у Варшаве адбылася

2011-09-16T15:51:00.003+03:00

Рэпартаж Радыё Рацыя

Фотарэпартаж Беларускай службы Радыё Палонія

Сустрэча з Зянонам Пазьняком

2011-09-14T02:15:00.005+03:00

Беларуская Нацыянальная Памяць 15 верасьня (чацьвер) запрашае на
сустрэчу са знакавай у беларускай гісторыі асобай, вядомым палітыкам -
Зянонам Пазьняком.

На сустрэчы адбудзецца прэзентацыя новых кніг сп. Пазьняка, якія можна
будзе набыць.

Сустрэча адбудзецца ў Collegium Civitas, aula A (Палац Культуры і
Навукі (PKiN), 12 паверх, pl. Defilad 1, Warszawa; уваход з боку
вуліцы Маршалкоўскай).

Пачатак а 18.00. Уваход вольны.

Дзень Беларускай Вайсковай Славы ў Варшаве

2011-09-14T02:03:00.004+03:00

Рэпартаж Эўрарадыё

Рэпартаж Радыё Свабода

Рэпартаж InterPolit

У Варшаве узгадалі памяць нарачонай Каліноўскага Марыі Ямант

2011-09-14T01:47:00.006+03:00

Артыкул на InterPolit

Рэпартаж Эўрарадыё

Ахвяраваньні на дзейнасьць БНП

2011-07-24T17:49:00.004+03:00

Сябры!

БНП будзе вельмі ўдзячная, калі вы падтрымаеце фінансава дзейнасьць нашай арганізацыі.

Зараз зьявілася новая магчымаць ахвяраваць на рэалізацыю мэтаў і планаў БНП праз

Paypal

Moneybookers

Жыве Беларусь!

Набывайце кнігу "Беларуская кухня. Моц смаку"

2011-07-23T23:03:00.005+03:00

Сябры, запрашаем набываць кнігу "Беларуская кухня. Моц смаку" (Беласток: Ортдрук, 2010. — 228 с.: іл. Цвёрдая вокладка).

Кошт у Польшчы - 55 злотых.

Больш пра кнігу можна даведацца тут

Рэпартаж Радыё Рацыя з прэзэнтацыі кнігі ў Беластоку

150 год з дня нараджэньня Магдалены Радзівіл

2011-06-30T10:50:00.002+03:00

8 ліпеня 1861 г. нарадзілася княгіня Магдалена Радзівіл, якая вельмі шмат спрыяла Беларускаму Адраджэньню "нашаніўскага перыяду". Больш падрабязна пра гэтую выбітную постаць нацыянальнай гісторыі можна прачытаць па гэтай спасылцы.

Славутая княгіня пахаваная ў прадмесьці Фрыбургу ў Швайцарыі. Месца можна паглядзець на інтэрактыўнай мапе Беларускія кропкі ў Эўропе.

У бліжэйшы час сябры БНП збіраюцца наведаць магілу Магдалены Радзівіл. Жадаючыя прыняць удзел у акцыі памяці, калі ласка, скантактуйцеся з намі.

Велапрабег у гонар Булак-Балаховіча

2011-05-15T22:31:00.002+03:00

Юрась Высоцкі, Варшава, Радыё Рацыя

13 кіламетраў па Варшаве на роварах у гонар генерала Булак-Балаховіча. Арганізацыя Беларуская Нацыянальная Памяць зладзіла роварны рэйд памяці беларускага ваеннага дзеяча.

Ініцыятарам велапрабегу выступіў старшыня Беларускай Нацыянальнай Памяці Анатоль Міхнавец.

- Пачнем тут ад помніка дэ Голя з цэнтру Варшавы і паедзем на тое месца, дзе ён загінуў. Вуліца Парыжская. Там была ягоная канспіратыўная кватэра і там Булак-Балаховіч загінуў у баю з немцамі 10 мая 1940 года. Мы наведаем тое месца, там ёсць памятная шыльда. А паздней мы плануем заехаць на Палонскія могілкі вайсковыя, дзе ёсць сімвалічная магіла генерала Булак-Балаховіча.

Нешматлікія ўдзельнікі рэйду пад бел-чырвона-белымі сцягамі, прымацаванымі да рамаў ровараў, распавялі чаму яны вырашылі паўдзельнічаць у акцыі.

- Я вельмі часта бяру ўдзел у беларускіх мерапрыемствах у Варшаве. Для мяне гэта нейкія маральныя вартасці. Люблю збірацца разам са сваімі роднымі людзьмі.

- Зацікавілася беларускай тэматыкай, хацела больш даведацца пра генерала Булак-Балаховіча.

Акцыя ўшанавання памяці беларускіх змагароў пройдзе і на Беласточчыне - гаворыць Анатоль Міхнавец.

- Гэтым рэйдам мы хочым гэтую памяць замацаваць, прапагандаваць, каб людзі далучаліся, каб ведалі. Братоў Булак-Балаховічаў было два: Станіслаў – старэйшы, а малодшы быў Язэп, якога забілі таксама – у Белавежскай пушчы агенты НКУС. 6 чэрвеня ўгодкі яго смерці. Таксама будзем рабіць такі рэйд – у мінулым годзе рабілі з Гайнаўкі да Белавежы, там ёсць яго магіла. Запрашаем таксама усіх далучыцца.

Булак-Балаховіч, асоба неадназначная і мае неадназначны лёс, які блага даследаваны. Але дакладна вядома тое, што ён быў таленавітым вайскоўцам і змагаўся за вольную Беларусь. У гэтым годзе – гэта 71-я ўгодкі са дня смерці беларускага генерала.

Роварны рэйд памяці генэрала Булак-Балаховіча

2011-05-10T23:03:00.001+03:00

10 траўня спаўняецца 71 год з дня сьмерці Булак-Балаховіча, - генэрала Беларускай Народнай Рэспублікі і Польскага войска.

Вечная слава і памяць героям!

Беларуская Нацыянальная Памяць ужо другі год запар арганізуе роварны рэйд памяці, які пройдзе па варшаўскіх месцах, зьвязаных зь імем генэрала.

Пачнецца а 12 гадзіне 14 траўня ад помніка Дэ Голя, далей праз мост Панятоўскага на правы бераг Віслы - на вуліцу Парыскую 27, месца сьмерці Булак-Балаховіча. Далейшы шлях павядзе на вайсковыя могілкі на Павонзках, месца сымбалічнага пахаваньня генэрала.

Працягласьць маршруту каля 13 км. Час разам з перапынкамі складзе каля 1,5 гадзіны.

Схема маршруту

Беларуская сымболіка на чэмпіянаце сьвету па хакею

2011-05-10T22:19:00.003+03:00

Сябры БНП падтрымалі зборную каманду Беларусі па хакеі на чэмпіянаце сьвету ў Славаччыне.

2011-05-08T23:41:00.001+03:00

Радаўніца 2011

2011-05-04T20:31:00.004+03:00

3 траўня на Радаўніцу ў Варшаве, Кракаве, Янаве Падляскім беларусы Польшчы ўшанавалі памяць беларускіх дзеячаў.

Чытайце больш падрабязна ў рэпартажы Эўрарадыё

Сябры БНП днямі адшукалі ў Янаве-Падляскім месца пахаваньня Сяргея Сарокі - грамадскага і праваслаўнага дзеяча, удзельніка заходнебеларускага культурна-асветнага руху ў міжваеннае дваццацігоддзе, рэдактара, выдаўца, публіцыста.

* * *

"Беларускія могілкі ў Варшаве". Пад такой назвай на Радыё "Рацыя" выйдзе рэпартаж ў праграме "Краязнаўчыя кропкі.

* * *

Кіраўнік БНП Анатоль Міхнавец выступіў у «Гарачым каментары» на тэлеканале БЕЛСАТ

8 гадавіна зь дня сьмерці Янкі Жамойціна.

2011-04-25T18:20:00.003+03:00

25 красавіка 2011 г. - 8 гадавіна зь дня сьмерці Янкі Жамойціна.

Актывісты БНП наведалі магілу сьв.пам. сп. Янкі Жамойціна на праваслаўных могілках (Warszawa-Wola).

Настаўнік, сябра і кіраўнік СБМ ў Наваградку, сябра Беларускай Незалежніцкай Партыі, вязень сталінскіх лягероў.

Вечны ўспамін!

40 мужоў харобрых

2011-04-25T17:27:00.000+03:00

25 красавіка спаўняецца 12 год легендарнаму шэсьцю ў Гародні, якое адчыніла новую старонку ў гісторыі беларускага нацыянальнага руху.

Зьмяшчаем артыкул Тацяны Сьнітко, які выйшаў у "Нашай Ніве" (№9 (130) 17.05.1999) і распавядае пра гэтую акцыю.

Іх атрымалася недзе чалавек з сорак.

Хлопец, апрануты ва ўсё чорнае, зірнуў на вежу з гадзіньнікам. Стрэлкі ішлі да мэты з зайдроснай упартасьцю, ня рухаючыся на вачах, але не спыняючыся. Цяпер яны рыхтаваліся акрэсьліць на плоскасьці часу чвэрць цыфэрбляту, сысьціся ў простым куце. Але людзі ўжо не стаялі купкай, а выраўняліся ў карэ. Па цёмна-плямістых шыхтах у паўцемры скакалі вогненныя цені. Яны выхоплівалі таксама колеры трох палотнішчаў над галовамі. Колеры чырвані на белым тле.

Праз імгненьне звон сарваўся з вышыняў вежаў гарадзенскіх храмаў і накрыў сабой плошчу. Узрушэньне хваляй прайшло па тварах людзей з паходнямі. Званы бласлаўлялі крок.

- Бог нас чуе! - натхнёна выгукнуў адзін.

- Жыве Беларусь! - рэхам данеслася ў адказ.

"...Жыве вечна!" - зноў падумаў у гэты час Невядомы чалавек. Званы засьпелі яго непадалёк, на самым рагу плошчы. Абярнуўшыся, ён убачыў калёну - і ўсё зразумеў. ***

- Бойка ў Горадні? - перапытваюць мяне знаёмцы й незнаёмцы. Калегі, міліцыянты, апазыцыянэры. Большасьць зь іх кажа, што "чулі штось такое!..". Чуткі вакол гарадзенскага шэсьця растуць. Як трава ў красавіку. Як курс даляра.

- Гэта, напэўна, ня нашыя былі. Наш сьцяг маглі ўзяць расейскія фашысты... гэбісты... розныя правакатары.

А гэта кажа мой знаёмы міліцыянт. Знаёмы, між іншым, і сваім колішнім "паляваньнем" на менскіх вулічных акцыях. Потым амаль слова ў слова тое ж паўтарае знаёмы бээнэфавец, на якога некалі паляваў той міліцыянт. Потым, дэманструючы нумар "Навінаў" з шыхтом невядомых людзей, большасьць знаёмых даводзіць пра таемны візыт замежных экстрэмістаў. "Мо, то былі унсоўцы, мо, чачэнцы нават...". Добра, хоць сабе косаўскія альбанцы. Але... Чаму ўсё ж не беларусы?! Чаму мы самі ў сабе зьняверыліся з-за гэтай мазахісцкай "талерантнасьці"?!

Мы прывыклі, што "нашыя" - гэта значыць "вузкае кола гэтых рэвалюцыянэраў" і "страшна далёкія яны ад народу". І мы ўсіх іх ведаем у твар, акрамя хіба што паўмітычнага Мірона. Мы самі ня верым у магчымасьць посьпеху.

Урэшце адзін хлапец, якога ніяк не западозрыш у залішняй лаяльнасьці да рэжыму, урачыста абвяшчае: "І я там быў!" - і знаходзіць сябе на здымку ў "Навінах". У самым канцы шэрагу, дзе ні халеры не разгледзець. "Вы жадаеце падрабязнасьцяў? О, вы атрымаеце іх! Я там быў". Мёд-піва піў, шаноўны. На жаль, у Менску толькі. Сама бачыла.
У прынцыпе, някепска, што ўсім хочацца быць героямі. Але вось калі карціць здавацца імі - гэта гамон. Прыехалі.

І тут я ўспомніла пра Невядомага Чалавека. 25-га ён мусіў быць менавіта ў Горадні. Ён павінен быў абавязкова знайсьціся. Невядомы Чалавек (з вашага дазволу, буду працягваць называць яго гэтак) у героі ня рваўся, усяведа зь сябе ня ўдаваў. Такім ня трэба хлусіць.

Першыя ягоныя словы пры нашай сустрэчы:

- Што, і ты таксама "ішла ў апошнім шэрагу"?

Нават пакрыўдзіцца захацелася.

Вось што распавёў пра гарадзенскія падзеі іхны непасрэдны відавочца...

Яны прайшлі па Савецкай мэтраў сто, калі іх ужо чакалі. Дзьве машыны амону і адна - з "цывільнымі" міліцыянтамі. Амонаўцы былі ў бронекамізэльках і з аўтаматамі.

Пасьля таго як міліцыянты пабачылі шыхт моладзі ва ўніформах, у іх быў стрэс. Яны ня ведалі, што рабіць. Я чуў, як адзін пачаў крычаць нешта кшталту: "Я запрошу базу! Что нам делать? Я запрашу базу!..". У "цывільных" гэты шок прайшоў хутчэй. "Іх трэба спыняць!" - і яны паставілі ўпоперак шыхта міліцэйскі "ўазік".

Тады ў шыхце пачулася нейкая кароткая каманда. Калёна проста абышла машыну й рушыла далей - прыкладна ў той бок, дзе ў Горадні месьціцца чыгуначны вакзал.

Праз мэтраў пяцьдзясят міліцыянты пачалі рабіць на калёну дробныя напады ззаду. Так бы мовіць, са сьпіны, выбіваючы людзей з апошняга шэрагу. А на вуліцы пры гэтым было шмат народу. Некаторыя людзі спачатку пачалі абурацца, крычаць: "Гэтыя эрэн'ешнікі, фашысты, колькі можна, ужо й да нас дабраліся!" А потым пабачылі ў чале калёны тры вялікія бел-чырвона-белыя сьцягі ды прымоўклі. Зразумелі, што гэта не РНЕ, а нешта цалкам адваротнае. Вакол мяне пачуліся крыкі: "БНФ! БНФ! БНФ!" Сабраўся натоўп чалавек прыблізна ў дзьвесьце. Ды там, ля ўнівэрмагу на Савецкай, звычайна тусоўка моладзі...

Менавіта ля гэтага ўнівэрмагу і ўспыхнула бойка. Міліцыя атакавала ззаду. Атакі адбівалі. Частка хлопцаў зь першых шэрагаў падалася назад і дапамагала выхопліваць сваіх таварышаў, якіх пачалі хапаць амонаўцы. Рух наперад усё ж павольна працягваўся. Але тут падскочылі міліцыянты, якія ехалі напярэймы. Я налічыў, што там сабраліся два "ўазікі" і тры звычайныя патрульныя машыны. Падцягваліся яшчэ й міліцэйскія нарады з райаддзелаў. Калёна відавочна трапляла ў аблогу.

Тады я заўважыў: хлопцы, што йшлі наперадзе, становяцца ў больш шчыльны шыхт. І раптам пачулася: "Ру-бон! Ру-бон!"

Народ адразу сьціх. Такога ў Горадні ня бачылі яшчэ ні разу. Міліцыя пачала наскокваць на шыхт дэманстрантаў, але ў рукох у тых палалі паходні. З боку глядзелася, быццам калёна ашчацінілася гэтымі паходнямі, як ёрш. З усіх бакоў, хто б ні спрабаваў сунуцца ўсярэдзіну - паўсюль мог натыкнуцца на вогнішча. Як я бачыў, адзін міліцыянт сапраўды натыкнуўся, абпаліўшы твар. Ён адразу выйшаў з гульні. Калёна паступова пачала прасоўвацца далей, да рогу Савецкай, дзе пачынаецца вуліца Ажэшкі.

І вось тут хлопцаў сапраўды пачалі браць у кола. Ужо пасьпела наехаць процьма машынаў. Відаць, дэманстранты вырашылі цьвёрда абараняцца далей, бо самі сталі ў кола. Я тады падумаў: у выпадку, калі б яны вырашылі прарываць кардон, у іх бы, напэўна, гэта атрымалася. Але - не, хлопцы гутарылі зь міліцыяй. Яны пыталіся, хто зь міліцыянтаў тут галоўны.

Дэманстранты прасілі міліцыю дазволіць ім прайсьці па вуліцы Ажэшкі, абяцалі адразу пасьля гэтага разысьціся й нічога не парушаць. Нехта з калёны напаўжарт прапанаваў амапаўцам таблеткі ад галаўнога болю. Мабыць, менавіта гэта іх і раззлавала. Пасьля сутычак яны й так не былі ў гуморы. Перамовы скончыліся тым, што амон пайшоў у атаку.

Аднак першыя атакі зноў былі адбітыя.

Яшчэ пасьля таго, як калёна спакойна абышла першую міліцэйскую машыну, міліцыя рабіла выгляд, што гэтая машына вось-вось пратараніць шыхты. Пару разоў "уазік" разганяўся й на вялікай хуткасьці рэзка тармазіў перад самымі людзьмі. Можна было не на жарт спужацца, ня дзіва, што нехта пару разоў стукнуў па капоце. Там усе былі ў стане шоку - што адзін, што другі бок.

Частка людзей, што стаялі ў натоўпе разам са мною, пайшла біцца за гэтых невядомых хлопцаў. Знайшліся некалькі чалавек, якія кінуліся біцца таксама, але - у шэрагі міліцыі. Вельмі хутка гэтыя людзі некуды зьніклі. Такое ўражаньне, што сам амон іх і папляжыў там: адрозьніць, хто - што, было дужа цяжка. Усе ў шокавым стане, а тут яшчэ нейкія людзі мітусяцца! Мянты даўблі ўсіх, хто побач.

Утварылася кола паміж абаронцамі й назіральнікамі, і ў гэтым коле бегалі міліцыянты. Стаяў вэрхал; з самых першых сваіх нападаў на калёну большасьць міліцыянтаў кідалася на шэсьце з такой гатоўнасьцю, быццам даўно чакала выпадку...

Бачачы, што разагнаць хлопцаў не атрымліваецца, міліцыя ўжыла газ. Мне асабіста падалося, што скарысталі і звычайны газ, і "Чаромху" (апошняя была, хутчэй за ўсё, ў амона). З адлегласьці мэтраў у 50 - я мусіў адысьці - выпушчаны газ глядзеўся, як туман.

Хлопцы пачалі разьбягацца хто куды. Абараняцца было немагчыма: пазалівалі вочы, твары, там не было ўжо чым дыхаць. Частку адразу "павязалі". Паклалі на асфальт, білі дубінкамі і аўтаматамі. Толькі прыкладамі, "стваламі", але было такое ўражаньне, што па іх гатовыя страляць.

Адразу ж ахова абклала вакзал, у бок якога рухалася шэсьце. Ператрасалі цягнікі, узьнялі ўсе пасты, якія маглі. Прыблізна апоўначы на вакзале было ўжо шмат "людзей у цывільным". Затрымлівалі ўсіх, нават малалетак, абы тыя мелі выгляд, хоць чымсь падобны да выгляду дэманстрантаў. Прыкметамі былі чорныя джынсы, чорныя курткі, "берцы" - вайсковыя боты на шнуроўцы. Асаблівую ўвагу зьвярталі на боты; хто быў у іх абуты - забіралі адразу безь лішніх "цырымоніяў". Я бачыў, як схапілі нейкага хлопца, можа ўдзельніка шэсьця, а мо й не. Твару ягонага я ня ведаў. Яго пасьля білі ў тупіку. Паставілі на расьцяжку ды мэтадычна зьбівалі. Пазьней высьветлілася, што разам з удзельнікамі забралі некалькі зусім выпадковых людзей, спрабавалі іх прышыць да справы.

Многіх з тых, хто адыходзіў, ратавалі самі гарадзенцы, мінакі, зусім незнаёмыя людзі. Гэтак цягнулася ўсю ноч. Усе, хто пасьпеў пачуць, што адбылося, сустракаючы ў горадзе хлопцаў з калёны, літаральна бралі за руку ды выводзілі ў бясьпечнае месца. Ранкам на месцы самай жорсткай бойкі нехта паклаў кветкі й бел-чырвона-белы сьцяг..."

Чамусьці ніхто нідзе яшчэ не згадаў адной цікавай дэталі: што адзін з удзельнікаў гарадзенскай акцыі пайшоў у міліцыю ды здаўся сам. Гэта, аднак, не была "яўка з павіннай". Менавіта гэты чалавек яшчэ перад пачаткам несанкцыяванай акцыі ўзяў на сябе ролю камандзіра. Потым ён ня мог стрываць таго, што ягоныя людзі з паламанымі касьцямі, пабітымі галовамі ня ўсе змаглі выбрацца зь месца пабоішча. Якраз пайшлі чуткі, што адзін з затрыманых нібыта патрапіў у рэанімацыю й можа памерці. Казалі, яго бачылі ў РАУСе непрытомным у лужыне крыві. Ніхто пакуль ня ведаў, што праўдай было толькі апошняе сьцьверджаньне.

Камандзір хлопцаў пайшоў па райаддзелах у пошуках затрыманых паплечнікаў. Калі верыць расповедам, выглядала гэта прыкладна так. У дзяжурку РАУСу заходзіць саліднага выгляду дзядзька ў форменнай вопратцы і строга пытаецца, дзе арыштаваныя дэманстранты. Міліцыянты выцягваюцца перад ім у струнку (думаюць, што прыехала нейкая праверка) і рапартуюць, што хлопцаў тут няма. Толькі з трэцяй спробы ў трэцім пастарунку замест "стрункі" вынікам запыту сталася разгубленасьць іншага кшталту. Паклікалі начальніка. Усю адказнасьць за акцыю камандзір хлопцаў узяў на сябе.

У інтэрв'ю мясцовай прэсе начальнік паведамляў аб дзесятку хуліганаў з гарадзенскага Маладога Фронту, якія пры выглядзе амону "адразу разьбегліся". Пры гэтым, зь ягоных словаў, асаблівых траўмаў не было. Між іншым, згодна зь міліцэйскімі апэратыўнымі зводкамі, для разгону дэманстрацыі былі скарыстаныя амон, ППСМ, спэцпадразьдзяленьні ўнутраных войскаў і апэрытыўна-вышуковыя службы міліцыі (паводле нашых зьвестак, усяго каля 350 чалавек).

Невядомы Чалавек распавёў, як пры затрыманьнях міліцыянты рэзалі на хлопцах на кавалкі камуфляжную форму. Але сапраўднае захапленьне выклікалі "трафэі" - скураныя папругі. У пастарунку некаторыя міліцыянты кінуліся тут жа прымяраць абноўкі, не зьвяртаючы ўвагі на затрыманых.

Пасьля сутачных адсідак па адміністратыўнай справе некаторых хлопцаў выклікалі для гутаркі ў КГБ. Гэбістаў найбольш зацікавіла кола, у якое дэманстранты выстраіліся дзеля абароны. Гутаркі яскрава дэманструюць, што ў нетрах лукашэнкаўскіх спэцслужбаў і зараз жыве трохгадовай даўніны "справа УНСО".

Адны ў Беларусі баяцца. Баяцца лёсу Тамары Віньнікавай, Генадзя Карпенкі, Арнольда Пячэрскага, Юрыя Захаранкі. Баяцца зьнікнуць. Знайшлося 40 мужоў харобрых. Якія не баяцца ўзьнікнуць.

Хрыстос уваскрос!

2011-04-25T00:36:00.004+03:00

Хрыстос уваскрос!

Уваскрэсьне Беларусь!

Віншуем Зянона Станіслававіча Пазьняка

2011-04-24T23:23:00.001+03:00

Віншуем Зянона Станіслававіча Пазьняка з днём народзінаў!
Зычым Божай ласкі!

Страйкбольная гульня памяці Якуба Харэўскага

2011-04-06T20:58:00.004+03:00

Беларуская Нацыянальная Памяць запрашае на страйкбольную гульню, прысьвечаную памяці славутага беларускага партызана Якуба Харэўскага-Новіка і ўсіх ўдзельнікаў збройнай барацьбы за вызваленьне Беларусі.

Гульня адбудзецца 9 красавіка недалёка ад Варшавы. Перад пачаткам кожны атрымае свой камплект рыштунку. Будзе таксама праведзены інструктаж адмыслоўцамі з каманды "Чорны кот".

Кошт удзелу – 30 злотых. Колькасьць месцаў абмежаваная. Просім жадаючых кантактаваць праз e-mail БНП.

Магіла Каліноўскага - гара Гедыміна

2011-03-22T18:57:00.000+02:00

22 сакавіка - дзень сьмерці К.Каліноўскага, які за кіраўніцтва нацыянальна-вызвольным паўстаньнем быў забіты на Лукішскім пляцы ў Вільні.

Вечная памяць Герою!

Сяргей Дубавец
Крыніца: газэта "Свабода"

У п’есе Ўладзіміра Караткевіча “Кастусь Каліноўскі” галоўны герой кажа генерал-губернатару Мураўёву крылатыя словы: “Кожны раз чалавецтва бліжэй да шчасця на вышыню нашых магіл”. Караткевіч ведаў, што Каліноўскі пахаваны на гары Гедыміна ў Вільні. Сапраўды, большае вышыні для магілы ў нашых краях не прыдумаеш. Але дакладнага месца пахавання славутага паўстанца Караткевіч не знайшоў. І сёння на магіле героя няма ані знаку. Між тым, яшчэ да мінулай вайны гэтае месца прыцягвала да сябе паломнікаў, тут стаяў помнік, былі абсталяваныя сцяжыны для шпацыру і нават фантанчык з пітной вадой...

На здымку: Славутая гара, славутая магіла... Вільня, 30 студзеня 2008 году. Фота газеты “Свабода”.

А пачалася гэтая гісторыя ўзімку 1864 году. 26-гадовы кіраўнік паўстання за незалежнасць Кастусь Каліноўскі быў схоплены расійскімі вайскоўцамі на канспіратыўнай кватэры на вуліцы Святога Яна ў тагачаснай сталіцы нашага краю Вільні. Адсюль яго пераправілі ў Дамініканскія муры – у кляштар, які быў пераабсталяваны пад турму. Экзекуцыя адбылася на Лукішскай плошчы 10 сакавіка. Шыбеніца, на якой павесілі героя, стаяла паміж будынкамі ўчорашняга КГБ (сёння тут музей генацыду) і Кансерваторыі.

Пасля экзекуцыі цела героя перавезлі па праспекце – тады Юраўскім, а сёння Гедыміна – проста на Замкавую гару. Там тады стаяў расійскі гарнізон. Паколькі месцы пахавання забітых паўстанцаў адразу ж ператвараліся ў месцы паломніцтва, было вырашана пахаваць героя на тэрыторыі гарнізону. Больш за тое, на месцы магілы была абсталяваная пляцоўка для гульні ў крыкет. Так доўжылася да пачатку першай сусветнай вайны, калі расійскі гарнізон пакінуў Вільню.

У 1915 годзе віленскія археолагі зрабілі раскопкі магілы, апісалі яе і дакументальна пацвердзілі факт пахавання ў ёй пятнаццаці паўстанцаў. Целы апазнавалі па вопратцы, у справаздачы, між іншым, згадваюцца “макасіны Каліноўскага”. А ў 1921 годзе на магіле быў зроблены мемарыял. Ён складаўся з вялікага драўлянага крыжа працы віленскага архітэктара Антона Вівульскага і мармуровай шыльды з імёнамі ўсіх пахаваных.

У 1940 годзе, пасля таго, як Сталін перадаў Вільню Літве, крыж быў спалены, а шыльда знікла без следу.

З тых часоў колішняя “пляцоўка для крыкету” ператварылася ў звычайную, парослую травой пустку. На самай вяршыні Замкавай гары сярод пакручастых рэльефаў яна такая роўная адна, таму адшукаць яе нескладана. Калі б вам давялося падымацца на гару на фунікулёры, дык вы і выйшлі б акурат да гэтай пляцоўкі.

Не выклікае сумневаў, што на месцы пахавання павінен быць хоць нейкі знак. Інакш паспалітым беларусам, што прыязджаюць у Вільню, знайсці і наведаць апошні прыстанак свайго нацыянальнага героя немагчыма. Праблема ў тым, што гара Гедыміна – галоўны сімвал літоўскай дзяржаўнасці. І літоўцы, натуральна, хацелі б захаваць гэты сімвал “чыстым” – без дадатковых асацыяцый. Таму звароты інтэлігенцыі або самадзейных суполак тут выніку не дадуць. Ініцыяваць устаноўку мемарыяльнага знаку на магіле Кастуся Каліноўскага можа і павінна беларуская дзяржава. Апроч усяго іншага, такія захады сталі б пазітыўнай справай у беларуска-літоўскіх міждзяржаўных дачыненнях.
Каліноўскі – герой нумар адзін нашага нацыянальнага эпасу.

Яму, як нікому іншаму, прысвечана вялікае мноства твораў літаратуры і мастацтва. Чаму? Бо ён, як ніхто іншы, аб’ядноўвае беларусаў самых розных, у тым ліку і супрацьлеглых, груп і поглядаў. Аб’яднаўчы патэнцыял гэтага імя і гэтага міфа ўнікальны.

Ды й літоўцам, па вялікім рахунку, не выгадна, каб сітуацыя заставалася такой, як ёсць. Бо калі магіла паўстанцаў ніяк не пазначаная, тады ўся Замкавая гара становіцца ў вачах беларусаў адной вялікай магілай Каліноўскага – як курган на месцы пахавання героя.

На здымках: Помнік на магіле паўстанцаў, які Ян Булгак сфатаграфаваў у 1930 годзе, і сённяшні выгляд гэтага месца. Вільня, 30 студзеня 2008 году. Фота газеты “Свабода”.

Беларускамоўная кляса ў Берасьці

2011-03-21T22:27:00.002+02:00

Дзень памяці Каліноўскага

2011-03-06T23:49:00.001+02:00

Лыжны прабег у гонар Каліноўскага

2011-02-27T13:15:00.005+02:00

26 лютага сябры Беларускай Нацыянальнай Памяці правялі лыжны рэйд у гонар Канстанціна Каліноўскага. Другі год запар удзельнікі праехалі на лыжах ад Баброўнікаў да Мастаўлянаў.

Перад пачаткам акцыі завіталі на Радыё "Рацыя" у Беластоку, дзе былі гасьцінна прынятыя супрацоўнікамі гэтай радыёстанцыі. Прыйшоў прывітаць удзельнікаў прабегу і вядомы гісторык Алег Латышонак, які запрасіў наведаць сядзібу Беларускага Гістарычнага Таварыства. Там кожны атрымаў у падарунак кнігу Янкі Запрудніка "Дванаццатка", а БНП у сваю бібліятэку атрымала падшыўку часопіса "Беларускі гістарычны зборнік".

Далей быў выезд у Баброўнікі і рэйд на лыжах. Праз 7 км нас ужо сустракалі Мастаўляны. Там нас чакала сумная вестка. Пэўны час таму памёр наш сябра, беларускі патрыёт сп. Уладзімер Зарэцкі. Сын памерлага разам з намі наведаў магілу сп.Уладзімера, дзе ўсе ўшанавалі яго памяць хвілінай маўчаньня і малітвай па хрысьціянскаму звычаю.

Канчатковай кропкай рэйду было месца былой сядзібы Каліноўскіх, дзе каля яе кутнага камяня адбыўся невялікі імправізаваны мітынг.

На зваротным шляху ў Беласток наш аўтобус з высока ўзьнятым бел-чырвона-белым сьцягам праехаў уздоўж памежнай чаргі беларускіх грузавікоў. Кіроўцы радасна віталі нас усмешкамі на тварах, воклічамі і гудкамі сваіх самаходаў.

Сябры, запрашаем у наступным годзе прыняць чынны ўдзел у лыжным рэйдзе ў гонар К.Каліноўскага. Памяць пра герояў павінна жыць вечна!

Жыве Беларусь!

Лыжны рэйд у гонар Кастуся Каліноўскага

2011-02-22T20:22:00.002+02:00

26 лютага Беларуская Нацыянальная Памяць запрашае на лыжны рэйд у гонар Кастуся Каліноўскага.

2 лютага 2011 г. – 173-я ўгодкі з дня народзінаў кіраўніка паўстаньня 1863 году ў Беларусі.
Лыжным рэйдам мы хочам ушанаваць памяць Каліноўскага і наведаць мясьціны,
дзе нарадзіўся славуты "Яська-гаспадар з-пад Вільні".

Збор удзельнікаў 26 лютага а 10.30 каля сядзібы Радыё Рацыя (вул. Цепла 1, Беласток)

128-я ўгодкі з дня нараджэньня генэрала Булак-Балаховіча

2011-02-09T23:00:00.000+02:00

Viva Кастусь!

2011-02-02T08:12:00.000+02:00

2 лютага - 173-я ўгодкі з дня нараджэньня вялікага сына беларускага народу і правадыра нацыянальна-вызвольнага паўстаньня 1863 году Кастуся Каліноўскага.

Беларуская Нацыянальная Памяць віншуе ўсіх з гэтай памятнай датай.

малюнак аўтарства Алеся Пушкіна

2010-12-21T22:17:00.002+02:00

Пушкін — галадуе, Рымашэўскі — пратэстуе

2010-12-18T23:03:00.003+02:00

Кандыдат на прэзыдэнта Віталь Рымашэўскі зладзіў каля будынку Крупскага РАУС пікет у падтрымку мастака Алеся Пушкіна. Разам з даверанымі асобамі і актывістамі БХД Віталь Рымашэўскі патрабаваў вызваленьня Алеся Пушкіна. Ад 9 сьнежня зьняволены мастак трымае ў турме галадоўку.

Алесь Пушкін дзевяты дзень трымае галадоўку

2010-12-17T00:55:00.003+02:00

Мастак Алесь Пушкін, якому суд Крупскага раёну прысудзіў 13 сутак арышту, трымае галадоўку. Пра гэта Еўрарадыё паведаміла жонка арыштаванага Яніна Пушкіна. Жанчына кажа, што яе пакуль не пусцілі да мужа:

Пушкіна: “Я яго не пабачыла. Я і запісалася на прыём да начальніка, але яго ў гэты дзень не было, калі я па запісе да яго пайшла. І мяне не прапусцілі. Ён не есць, але, здаецца, гаворыць”.

Павел Сапелка: Адміністрацыйныя справы супраць Пушкіна сфабрыкаваныя

2010-12-15T23:27:00.003+02:00

13 снежня адвакат Павел Сапелка вывучыў матэрыялы справы, скіраванай супраць вядомага беларускага мастака Алеся Пушкіна, якога суд Крупскага раёну пакараў 13-цю суткамі адміністрацыйнага арышту па двух артыкулах КаАП - хуліганства і непадпарадкаванне законным патрабаванням супрацоўнікаў праваахоўных органаў. Прысуд вынесла 9 снежня суддзя Вольга Фома.

Па словах адваката, пасля азнаямлення з матэрыяламі справы і доказнай базай у здзяйсненні правапарушэнняў, ён прыйшоў да высновы, што яна сфабрыкаваная пры дапамозе паказанняў двух выкліканых сведкаў. Пры гэтым супрацоўнікі міліцыі нават не знайшлі часу дамагчыся поўнага адзінства паказанняў. Так спачатку адзін са сведкаў (сусед) распавёў, што патэлефанаваў у міліцыю пасля таго, як Пушкін штурхнуў яго, той паваліўся і разбіў сабе нос. Паколькі ў гэтым выпадку давялося б прыкладаць заключэнне экспертызы, якое фальсіфікаваць значна цяжэй, сведка пасля памяняў паказаньні, сцвярджаючы, што Пушкін з ім скандаліў і нецэнзурна лаяўся.

"Страта" - карціна Алеся Пушкіна

«Пагоня» назвала Алеся Пушкіна вязьнем сумленьня

2010-12-12T20:28:00.005+02:00

"На Радзіме" - карціна Алеся Пушкіна

Крыніца: Радыё Свабода

Мастакі творчай суполкі “Пагоня” выступілі з адкрытым лістом з нагоды арышту Алеся Пушкіна, у якім выказалі пратэст супраць дзеянняў уладаў Крупскага раёну і абвясьцілі мастака Алеся Пушкіна вязьнем сумленьня.

Мастакі заклікалі праваабарончыя арганізацыі, АБСЭ даць належную ацэнку дзеяньням сілавых структураў Крупскага раёну і правесці незалежнае расьсьледаваньне па факце арышту мастака Алеся Пушкіна.

Алесь Пушкін быў арыштаваны 8 сьнежня, Крупскі раённы суд прысудзіў яму 13 сутак арышту за злоснае хуліганства – за тое, што мастак выправадзіў з двара ўласнага дому нязванага госьця.

“Мы ня маем намеру ціснуць на правасудзьдзе, але выклікае вялікі сумнеў тое, што Алесь Пушкін учыніў злоснае хуліганства, ударыўшы незнаёмца. У экстрэмальных умовах, у якіх ня раз быў мастак, такога за ім не заўважалася. За ўсё сваё жыццё ён ні разу нікога ня ўдарыў”, – пішуць мастакі.

На іх погляд, дзеяньні сілавых структураў у дадзеным выпадку накіраваныя на “зачышчэньне тэрыторыі перад прэзыдэнцкімі выбарамі”.

Алесь Пушкін пад арыштам трэці дзень

2010-12-11T22:24:00.003+02:00

Беларускі мастак, арыштаваны 8 сьнежня ў сваім мястэчку Бобр, трэці дзень знаходзіцца пад вартай.

"Сёньня" - карціна мастака Алеся Пушкіна

27 лістапада - Дзень Герояў!

2010-11-26T19:44:00.000+02:00

Дарагія землякі!

Беларуская Нацыянальная Памяць віншуе ўсіх Вас з Днём Герояў, калі Беларусы
пачалі Слуцкі Збройны Чын.

Слуцкі Збройны Чын - гэта яскравы прыклад для нас, як змагацца за Бацькаўшчыну
пры любых абставінах. Случчакі разумелі, якой каштоўнасьцяй ёсьць для кожнага
народу воля і незалежнасьць, і вырашылі ісьці ратаваць беларускую незалежную
дзяржаву - Беларускую Народную Рэспубліку - хаця і добра ведалі, якім будзе
асабісты кошт гэтага змаганьня. Пра гэта яскрава сьведчыць выраз на сьцягу
змагароў: Пайшлі ўміраць, каб жыла Бацькаўшчына.

Давайце належна ўшануем памяць сваіх дзядоў. Бо толькі калі мы ўсе усьвядомім
тое, што ведалі слуцкія змагары, толькі калі наш край станецца назаўсёды
незалежным, зажыве беларускі народ вольна, заможна і шчасьліва. На нас ляжыць
адказнасьць за будучыню роднай Айчыны.

Слава героям!
Жыве Беларусь!

Створаны грамадскі камітэт у абарону Касцёла святога Язэпа

2010-11-18T19:25:00.002+02:00

17 лістапада ў Менску абвешчана аб стварэнні грамадскага камітэта ў абарону Касцёла святога Язэпа “Духоўнае сэрца Менску”.

Прэзентацыя структуры адбылася на прыступках святыні. Стваральнікі камітэта – грамадскія актывісты - паведамілі журналістам пра кірункі дзейнасці камітэту.

Па-першае, гэта – інфармаванне грамадскасці аб тым, што насамрэч адбываецца з Касцёлам. Па-другое, - шырокае грамадскае абмеркаванне сітуацыі вакол Касцёла святога Язэпа. Таксама актывісты грамадскага камітэта маюць намер весці судовае разбіральніцтва з прадпрыемствам “Менская спадчына”, якое ажыццяўляе незаконную перабудову святыні.

Апагеем дзейнасці грамадскага камітэта ў абарону Касцёла святога Язэпа “Духоўнае сэрца Менску” стане ініцыяванне правядзення агульнагарадскога рэферэндуму, каб жыхары сталіцы самі далі адказ на пытанне, чаму быць: Касцёлу або гатэлю.

Падчас прэзентацыі грамадскага камітэту была распаўсюджана наступная заява:

Заява грамадскага камітэту “Духоўнае сэрца Менску”

Мы, грамадзяне Рэспублікі Беларусь, абураныя бязбожным планам рэканструкцыі кляштарнага комплекса і храма св. Язэпа. Мы пратэстуем супраць перабудовы асвечанага храма і кляштара – месца малітвы і духоўнага адраджэння нашага народа – пад гасцінічны комплекс, увесяляльныя залы, рэстараны па вул. Кірыла і Мяфодзія, пад нумарамі 4, 6, 8.

Цягам апошніх пяці год вернікі штодня моляцца пад сценамі былой святыні. У дзяржаўныя ўстановы былі накіраваныя дзясяткі зваротаў, якія не далі выніку. У 2007 годзе каталіцкія актывісты сабралі больш як 30 тысяч подпісаў з просьбай вярнуць касцёл – але становішча не змянілася. У верасні 2010 года было сабрана яшчэ 6,5 тысяч подпісаў. Каля касцёла ладзіліся акцыі салідарнасці, мастацкія пленэры, галадоўкі. Але ўлады ўпарта адмаўляюцца ўлічваць меркаванне грамадскасці, дасылаючы звычайныя адпіскі.

Між тым увесну гэтага году пад маркай “рэканструкцыі” з грубейшымі парушэннямі заканадаўства распачалася перабудова будынкаў кляштара пад гатэльны комплекс. Будынак, дзе маліліся і вывучалі Слова Божае, улады ператвараюць у месца распусты і марнатраўства.

Згодна з арт. 4 “Закону аб архітэктуры і горадабудаўніцтве”, рэканструкцыя гістарычных аб’ектаў мусіць узгадняцца з грамадскасцю адпаведнага горада. КУП “Мінская спадчына”, пачаўшы “рэканструкцыю”, а ў сапраўднасці разбурэнне кляштара бернардынцаў (Мінск, вул. Кірыла і Мяфодзія, 6, 8), груба парушыла закон. Па пытанні касцёла св. Язэпа і кляштара бернардынцаў такога абмеравання не было. Улады яго “замянілі” фармальным круглым сталом у рэдакцыі газеты “Рэспубліка” 10 жніўня 2007 году.

23 жніўня на тэлеканале АНТ выйшла ў эфір праграма “Выбар”, прысвечаная пытанню гісторыка-культурных каштоўнасцяў. Між тым у галасаванні 92% людзей выказаліся за захаванне гістарычнай праўды, г.з. за вяртанне касцёла і кляштара вернікам.

Да сённяшняга дня невядома якім чынам перададзены ў 1992-93 гадах грэка-каталіцкай парафіі касцёла і кляштар бернардынцаў зноў апынуўся ва ўласнасці дзяржавы. Чаму ў 2001 годзе ў будынку па адрасе вул. Кірылы і Мяфодзія, 4 была зарэгістраваная парафія, а зараз раптам аказваецца, што гэтая парафія зарэгістраваная па адрасе вул. Савецкая. Хто з’яўляецца рэальным уладальнікам і інвестарам па перабудове? Чаму парушаюцца ўсе магчымыя законы і пастановы?

Сёння на тэрыторыі гісторыка-культурнай каштоўнасці адначасова праходзяць два ўзаемнавыключальныя працэсы: пошук рашэнняў па рэгенэрацыі і развіццю гістарычнага цэнтра і груба парушаючы дзейнае заканадаўства працэс хаатычнага асваення пляцовак дадзенай тэрыторыі.

Абураныя дзеяннямі ўладаў мы ствараем грамадскі камітэт у абарону гісторыка-культурнай спадчыны Менску. Мы лічым, што ў сэрцы Менску не месца гандлёва-забаўляльным аб’ектам. Цэнтр павінен стаць духоўным сэрцам горада.

План дзеянняў грамадскага камітэту:

- Шырокае інфармаванне грамадскасці аб сітуацыі з гістарычным цэнтрам Менску.
- Судовае разбіральніцтва па фактах злоўжывання заканадаўствам КУП “Мінская спадчына”.
- Адкрытае грамадскае абмеркаванне праблемы з удзелам усіх зацікаўленых бакоў, у тым ліку на беларускім тэлебачанні і ў дзяржаўнай прэсе.
- Мінскі гарадскі рэферэндум у сакавіку-красавіку 2011 года па пытанні вяртання касцёла св. Язэпа і кляштара бернардынцаў.
- Распрацоўка праекта закона аб рэстытуцыі.
- Патрабаванне ўключэння прадстаўнікоў грамадскага камітэту ў склад метадычна-навукова Рады пры Міністэрстве культуры.

Заклікаем далучыцца да працы грамадскага камітэту усіх неабыякавых людзей. Мы лічым, што цэнтр Менску належыць усім пакаленням нашай краіны, якія на працягу стагоддзяў яго стваралі, жывуць сёння і будуць жыць заўтра.

Ірына Губская
Ганна Шапуцька
Анатоль Міхнавец
Аляксей Марачкін
Уладзімір Арлоў
Дзіна Шаўцова
Мікалай Арцюхоў
Алег Трусаў
Генадзь Барбарыч
Вера Ціцянкова
Сяргей Воўчак
Таццяна Кім
Марына Баброўская
Іван Нікітчанка
Ніна Аўгіння Багінская
Лелета Устыновіч

5 лістапада нарадзіўся Міхал Вітушка

2010-11-05T17:20:00.000+02:00

5 лістапада 1907 году нарадзіўся Міхал Вітушка - кіраўнік антыбальшавіцкага падпольля ў Беларусі ў 1940-50-я гады.

Дзяды ў Варшаве

2010-10-29T20:36:00.001+03:00

Беларуская Нацыянальная Памяць запрашае усіх беларусаў, якія знаходзяцца ў Польшчы, на дзень памяці продкаў — Дзяды.

У панядзелак, 1 лістапада, сустракаемся а 12-й на пляцоўцы каля мэтро Centrum.

Наведаем магілы выбітных беларусаў, якія знайшлі спачын у Варшаве, запалім зьнічы, а гісторыкі распавядуць нам аб гэтых асобах.

Без мінулага няма будучыні! Чакаем вас!

Сьвіслач 2010

2010-10-10T16:56:00.002+03:00

Адбылася страйкбольная гульня

2010-09-19T22:56:00.002+03:00

Дзякуй усім удзельнікам страйкбольнай гульні памяці Янкі Філістовіча, якая адбылася сёньня ў Варшаве.

Памятайма беларускіх герояў! Усіх, што пайшлі паміраць, каб жыла Бацькаўшчына!

Запрашаем на страйкбольную гульню ў Варшаве

2010-09-18T00:20:00.002+03:00

Беларуская Нацыянальная Памяць і страйкбольная каманда "Чорны Кот" запрашаюць на страйкбольную гульню "Янка Філістовіч. Вяртаньне Нацыяналіста".

Гульня прысьвечана 59-ым угодкам дэсантаваньня Янкі Філістовіча, удзельніка антысавецкага падпольнага руху, у Беларусь. 9 верасьня 1951 году Янка Філістовіч вярнуўся ў Беларусь, каб змагацца за волю роднага Краю. Нашую гульню мы прысьвячаем таксама ўсім ваярам, якія са зброяй ў руках змагаліся за незалежнасьць Беларусі.

Гульня адбудзецца 19 верасьня (нядзеля) з 12 да 14.30.

На месцы можна будзе арэндаваць страйкбольны прывад з магазінамі і кулькамі, а таксама акуляры. Цана камплекту - 15 зл. Апранайцеся адпаведна надвор'ю. Боты пажадана вайсковыя, альбо турыстычныя, ці прынамсі такія, якіх не шкада забрудзіць.

Жадаючыся, калі ласка, звязвайцеся з намі праз электронную пошту.

Cустрэча зь Зянонам Пазьняком

2010-09-06T15:17:00.004+03:00

9 верасьня ў Варшаве адбудзецца сустрэча са знакавай у беларускай гісторыі асобай, вядомым палітыкам - Зянонам Пазьняком.

Пачатак а 17.30 у аўле А у Collegium Civitas (Палац Культуры і Навукі (PKiN), 12 паверх, pl. Defilad 1, Warszawa; уваход з боку вуліцы Маршалкоўскай).

На сустрэчы адбудзецца таксама прэзэнтацыя новых кніг сп. Пазьняка, якія можна будзе набыць.

Сьвяткаваньне Дня беларускай вайсковай славы ў Варшаве

2010-09-02T23:39:00.003+03:00

8 верасьня 2010 году адбудзецца шэсьце ў гонар беларускай Перамогі ў бітве пад Воршай, якое арганізуе варшаўская грамада Беларускай Нацыянальнай Памяці.

Пачатак а 17.30 гадзіне каля помніка Дэ Голю.

Прыходзьце сьвяткаваць Дзень беларускай вайсковай славы з нацыянальнай сымболікай!

У памяць пра генэрала

2010-06-15T19:59:00.003+03:00

12 чэрвеня з Гайнаўкі да Белавежы (Польшча) адбыўся велапрабег у гонар генэрала Язэпа Булак-Балаховіча, арганізаваны БНП.

Эўрарадыё

Радыё "Рацыя"

Cустрэча з Юрыем Туронкам

2010-06-15T19:44:00.003+03:00

11 чэрвеня 2010 у Варшаве адбылася сустрэча з вядомым гісторыкам Юрыем Туронкам.

Спадар Юры распавёў пра стварэньне і дзейнасьць Саюзу Беларускай Моладзі.
Былі паказаныя архіўныя здымкі пра дзейнасьць СБМ.

Ня гледзячы на паважны узрост, у красавіку гэтага году спадар Юры сьвятаваў 81 дзень народзінаў, ён і надалей займаецца дасьледваньнем падзеяў ІІ сусветнай вайну.

Гэты пярыяд гісторыі Беларусі зьяўляецца найбольш абылганым савецкай прапагандай.
Кнігі спадара Юрыя былі аднымі з першых спробаў адкінуць хлусьню прапаганды і паказаць
тое, што было сапраўды ў Беларусі тыя часы.

У восень адбудзецца наступная сустрэча з нашым славутым гісторыкам.

Сустрэча з прафэсарам Туронкам

2010-06-10T09:20:00.000+03:00

11 чэрвеня а 18 гадзіне ў варшаўскім Collegium Civitas (Палац Культуры і Навукі (PKiN) 12 паверх, заля 1222, pl. Defilad 1, уваход з боку вуліцы Маршалкоўскай) адбудзецца сустрэча з доктарам гісторыі Юрыем Туронкам, прысьвечаная Саюзу Беларускай Моладзі.

Юры Туронак - вядомы дасьледчык гісторыі Беларусі часоў нямецкай акупацыі, аўтар кнігі "Людзі СБМ".

Велапрабег памяці Язэпа Булак-Балаховіча

2010-06-09T10:01:00.004+03:00

Беларуская Нацыянальная Памяць, Зьвяз беларускай моладзі, Беларускае аб'яднаньне студэнтаў запрашаюць 12 чэрвеня 2010 году на велапрабег памяці Язэпа Булак-Балаховіча.

Стартуем у Гайнаўцы а 12 гадзіне ад сядзібы Беларускага музэя (вул. 3 Мая, 42). Фініш - у Белавежы.

Ушануем памяць тых, хто змагаўся, каб жыла Бацькаўшчына!

"Беларусы ў Літве: учора і сёньня"

2010-05-26T22:07:00.004+03:00

22 траўня ў Беластоку адбылася прэзэнтацыя кнігі Алеся Адамковіча "Беларусы ў Літве: учора і сёньня".

Жадаючыя набыць гэтую кнігу ў Варшаве, калі ласка, зьвяртайцеся да нас.

Віленскі зборнік

2010-05-26T22:02:00.002+03:00

Фотаздымкі з велапрабегу ў гонар генэрала Булак-Балаховіча

2010-05-19T19:18:00.005+03:00

Больш здымкаў можна паглядзець у нашым фотаальбоме:

Велапрабег у гонар генэрала С.Булак-Балаховіча

Беларусы Варшавы зладзілі велапрабег у гонар Булак-Балаховіча

2010-05-17T20:52:00.002+03:00

Наста Ільіна, Эўрарадыё

15 траўня ў Варшаве адбыўся велапрабег, прымеркаваны да 70-й гадавіны са дня смерці беларускага генерала Станіслава Булак-Балаховіча. У велапрабегу памяці ўзялі ўдзел больш як 20 беларусаў, якія жывуць у Варшаве. Да іх далучыліся салідарныя палякі. Ініцыятарам велапрабегу стала арганізацыя "Беларуская нацыянальная памяць".

Удзельнікі прабегу праехалі калі 14 кіламетраў вуліцамі Варшавы. Яны наведалі памятную шыльду ў гонар Булак-Балаховіча, а таксама яго сімвалічную магілу, што знаходзіцца на Павонзкіх вайсковых могілках.

Нагадаем, што славуты беларускі генерал быў забіты Гестапа ў Варшаве 10 траўня 1940 года. Дагэтуль не знойдзена цела генерала. Невядомыя і абставіны яго трагічнай смерці.

Успамін генэрала Булак-Балаховіча

2010-05-10T14:46:00.005+03:00

10 траўня спаўняецца 70 гадоў з дня сьмерці генэрала Станіслава Булак-Балаховіча, генэрала Беларускай Народнай Рэспублікі і Польскага войска.

Вечная слава і памяць героям!

У сувязі з гэтай памятнай нагодай Беларуская Нацыянальная Памяць пры падтрымцы тэлеканала "Белсат" арганізуе

Велапрабег пройдзе па варшаўскіх месцах, зьвязаных зь імем генэрала. Пачнецца а 11 гадзіне 15 траўня ад помніка Дэ Голя, далей праз мост Панятоўскага на правы бераг Віслы - на вуліцу Парыскую 27, месца сьмерці Булак-Балаховіча. Далейшы шлях павядзе на вайсковыя могілкі на Павонзках, месца сымбалічнага пахаваньня генэрала.

Працягласьць маршруту каля 13 км. Час разам з перапынкамі складзе каля 1,5 гадзіны.

Тэлеканал "Белсат" падрыхтаваў падарункі для кожнага ўдзельніка велапрабегу.

Схема маршруту

Глядзі он-лайн дакумэнтальны фільм "Генэрал няскончанай вайны", зьняты тэлеканалам "Белсат".

Гадавіна сьмерці Міхала Вітушкі

2010-04-27T01:09:00.003+03:00

На 27 красавіка прыпадае чацьвертая гадавіна з дня сьмерці Міхала Вітушкі, кіраўніка Беларускага антыбальшавіцкага Супраціву ў 1945 — 1959 гадах. Ён памёр у Заходняй Нямеччыне, дзе жыў пад іншым прозьвішчам. А ў Беларусі яго “пахавалі” яшчэ ў 1945-м.

Падрабязьней пра жыцьцё і дзейнасьць Міхала Вітушкі тут.
Цікавыя зьвесткі зьявіліся на блогу burk001.

Беларусы на чэмпіянаце сьвету па хакею

2010-04-26T22:30:00.003+03:00

Беларусы!

Набліжаецца чэмпіянат сьвету па хакею, які пройдзе ў траўні ў Нямеччыне. Беларуская каманда гуляе 9, 11, 13 траўня ў Кёльне (Lanxess Arena). Нашыя супернікі ў групе А: Расея, Казахстан, Славаччына.

Нашым спартоўцам патрэбна падтрымка заўзятараў. Нацыянальныя сымбалі даюць моц! Яскравы прыклад папярэдні чэмпіянат сьвету па хакею. Колькі станоўчых эмоцыяў выклікала ПАГОНЯ, якую сябры БНП зьмясьцілі на трыбуне пад час гульняў.

Шмат разоў былі на розных спаборніцтвах і ведаем, што гэта важнае для спартоўца, важная нашая падтрымка. Гэта патрэбнае і важнае для нашай Беларусі!

Жыве Беларусь!

Карысныя спасылкі:
старонка чэмпіянату сьвету па хакею
расклад гульняў

Успамін Зьміцера Касмовіча

2010-04-23T21:52:00.005+03:00

23 красавіка 1991 году пайшоў з жыцьця Зьміцер Касмовіч - беларускі палітычны і грамадзкі дзеяч.

На фота З. Касмовіч са сваёй жонкай Надзеяй Колас

У 2007 годзе сябры БНП наведалі яго магілу ў Штутгарце.

Узнагароды Зьміцера Касмовіча

2010-04-18T18:31:00.005+03:00

Ад імя беларусаў у жалобных урачыстасьцях прыняў удзел кіраўнік БНП Анатоль Міхнавец. 16 красавіка ён аддаў даніну павагі ў ганаровай варце ля трунаў Прэзыдэнта Польшчы Леха Качыньскага і яго жонкі Марыі ў прэзыдэнцкім палацы.

17 красавіка сябры БНП з нацыянальным сьцягам удзельнічалі ў разьвітальнай цырымоніі з ахвярамі авіякатастрофы ў Смаленску, што адбывалася на плошчы Пілсудзкага ў Варшаве.

Збор сродкаў на выданьне кнігі С.Вітушкі працягваецца

2010-04-14T20:35:00.000+03:00

БНП працягвае збор сродкаў на выданьне кнігі С.Вітушкі.

Вялікі дзякуй беларускай студэнтцы Любові Зубровіч, якая ахвяравала 50 эўра (каля 200 польскіх злотых).
Дзякуем спн. Алене, якая ахвяравала на кнігу 100 злотых.
Віталь Куплевіч - 50 злотых,
Максім Драгун - 20 злотых,
сп.Ануфры - 20 злотых,
Усевалад Шлыкаў - 50 злотых,
Вольга - 60 злотых,
А. К. - 100 злотых,
А. і Г. Дар - 100 злотых,
сп. Антона Ясіновіча - 20 USD,
Алеся Аляхновіча - 100 злотых,
Аляксей і Люда (Аполе) - 50 злотых,
I.K. - 20 злотых.

Агульная сума ахвяраваньняў складае 1330 злотых.

Спасылкі на некаторыя матэрыялы пра С.Вітушку:
інтэрвію на Радыё "Свабода"
відэа з БЕЛСАТ

Віталь Гуркоў - лепшы баец K-1 Усходняй Эўропы

2010-03-25T15:40:00.004+02:00

Віншуем Віталя Гуркова з перамогай у супэртурніры К-1 World Max 2010 East Europe Tournament!

Больш пра Віталя Гуркова тут.

Запрашаем 28 сакавіка падтрымаць Ігара Бугаенку на турніры K1 World GP 2010 у Варшаве.

З Днём Волі!

2010-03-25T12:13:00.001+02:00

У Варшаве Лявон Баршчэўскі прачытаў лекцыю пра Дзень Волі

2010-03-25T11:48:00.006+02:00

Радыё Рацыя
Наста Ільіна, Варшава

Беларусы Варшавы адзначылі 92-ю гадавіну абвяшчэння БНР адкрытай лекцыяй Лявона Баршчэўскага. Падчас лекцыі вядомы літаратар і палітык зрабіў гістарычны агляд памятнай даты, а таксама распавёў пра дзяржаўныя незалежніцкія традыцыі Беларусі ў ХХ стагоддзі.

Адказваючы на пытанні аўдыторыі, выступоўца падкрэсліў, што беларусы дыяспары мусяць трымацца разам і намагацца ўплываць на становішча ў Беларусі.

Ініцыятарам сустрэчы выступіла арганізацыя "Беларуская Нацыянальная Памяць". Пасля афіцыйнай часткі мерапрыемства ўдзельнікаў чакаў святочны салодкі пачастунак.

На сустрэчы прысутнічала спадарыня Іна Рэўт, адна з пераможцаў Беларускай агульнанацыянальнай дыктоўкі.
Яна атрымала прызы ад БНП, Belsatu і сп. Лявона Баршчэўскага.

Сустрэча зь Лявонам Баршчэўскім у Варшаве

2010-03-23T09:14:00.002+02:00

Беларуская Нацыянальная Памяць запрашае 24 сакавіка 2010 году на сустрэчу зь беларускім філёлягам, перакладнікам, грамадзкім дзеячам і палітыкам, былым старшынём Партыі БНФ Лявонам Баршчэўскім.
Сустрэча прысьвечана надыходзячаму Дню Волі.

Запрашаем усіх зацікаўленых а 18 гадзіне ў Collegium Civitas.

аўла А
Collegium Civitas
Палац Культуры і Навукі (PKiN) 12 паверх
pl. Defilad 1, Warszawa
уваход з боку вуліцы Маршалкоўскай

Дзень памяці Кастуся Каліноўскага

2010-03-22T14:29:00.016+02:00

22 сакавіка 1864 году на Лукішскім пляцы ў Вільні расейскія карнікі забілі нацыянальнага героя, кіраўніка нацыянальна-вызвольнага паўстаньня ў Беларусі і Літве, Кастуся Каліноўскага.

З гэтай нагоды ўчора ў Вільні Беларуская Нацыянальная Памяць пры падтрымцы Таварыства беларускай культуры ў Летуве арганізавала і правяла Дзень памяці Кастуся Каліноўскага.

20 сакавіка ўвечары грамада Беларускай Нацыянальнай Памяці колькасьцю 16 чалавек рушыла ў кірунку Вільні. Першым прыпынкам стала Коўна. На могілках Petrašiūnų kapinės наведалі магілу Клаўдзія Дуж-Душэўскага. Прыбралі пахаваньне, запалілі зьнічы і ўшанавалі памяць Беларускага дзеяча малітвай "Ойча наш".

А 12 гадзіне ў Вільні распачаўся Дзень Памяці Кастуся Каліноўскага. У навучальным корпусе ЭГУ адбылася акадэмія, на якой перад прысутнымі выступілі гісторык Юры Бачышча, краязнаўца Уладзімір Хільмановіч і кіраўнік БНП Анатоль Міхнавец.

А 15.30 на Лукішскім пляцы пачалося шэсьце ў гонар Кастуся Каліноўскага. Каля памятнага крыжа выступіў Сяргей Дубавец, які распавёў пра апошні дзень жыцьця Кастуся Каліноўскага і пра месцы ў Вільні, якія мы павінны памятаць і ведаць. Ад памятнага крыжа беларуская грамада, якая налічвала каля 70 чалавек, рушыла да месца, дзе кіраўнік паўстаньня 1863 году К.Каліноўскі быў пакараны сьмерцю. Зараз на гэтым месцы знаходзіцца помнік летувісам, якія змагаліся і загінулі за волю Летувы. Каля сымбалічнай Галгофы беларусы ушанавалі памяць нашых і летувіскіх паўстанцаў запаліўшы бел-чырвона-белыя зьнічы.

Далей шэсьце рушыла па прашпекце Гэдыміна да Замкавай Гары. Наперадзе калёны была Пагоня і партрэт Кастуся Каліноўскага, які намаляваў і нёс Алесь Пушкін.

На Замкавай гары адбылася заключная частка Дня памяці. Побач з месцам пахавання Кастуся Каліноўскага адбылася памінальная цырымонія. Выступілі спадары Сяргей Дубавец, Алег Мінкін і Хведар Нюнька. На месцы магілы былі запаленыя зьнічы, пакладзены кветкі. Памяць Кастуся Каліноўскага і усіх паўстанцаў, якія змагаліся за Волю нашага Краю была ўшанавана хвілінай маўчаньня.

Напрыканцы Дня Памяці Анатоль Міхнавец заклікаў усіх ушаноўваць памяць Кастуся Каліноўскага ўсімі даступнымі мерамі, як ў Вільні, так і ў Беларусі. 22 сакавіка павінны гарэць зьнічы і ляжаць кветкі ва ўсіх памятных месцах.

А 17 гадзіне на Замкавай гары беларусы выгукнулі паўстанцкі пароль:
-Каго любіш?
-Люблю Беларусь!
-Дык узаемна!

За дапамогу выказваем падзяку сп.сп. Сяргею Дубаўцу, Алесю Смалянчуку, Хведару Нюньку, Артуру Яўмену, Аляксею Махначу, Кірылу Атаманчыку, Тацяне Елавой, Таварыству беларускай культуры ў Летуве, ЭГУ, БУНТу і ўсім тым, хто дапамагаў у арганізацыі Дня памяці Кастуся Каліноўскага.

Больш фотаздымкаў з мерапрыемства можна паглядзець тут і тут.

Дзень Памяці Кастуся Каліноўскага

2010-03-15T10:01:00.001+02:00

22 сакавіка 1864 году расейскія карнікі забілі нашага нацыянальнага героя, кіраўніка нацыянальна-вызвольнага паўстаньня ў Беларусі і Літве Кастуся Каліноўскага.

Беларуская Нацыянальная Памяць ладзіць Дзень Памяці Кастуся Каліноўскага.

21 сакавіка 2010 году ў Вільні а 12 гадзіне пройдзе акадэмія, прысьвечаная Кастусю Каліноўскаму і паўстаньню 1863 года. З адкрытымі лекцыямі выступяць гісторыкі і краязнаўцы.

А 15.30 адбудзецца шэсьце ад Лукішскага пляцу да гары Гэдыміна, дзе пахаваны Кастусь Каліноўскі.

Усе жадаючыя, асабліва тыя, хто ў гэты час будзе знаходзіцца ў Вільні, далучайцеся! Хто мае магчымасьць, прыязджайце ў Вільню, каб разам ушанаваць памяць змагара за волю нашага Краю. Хто мае магчымасьці, арганізоўвайце дзень памяці Кастуся Каліноўскага ў Беларусі: у месцах, зьвязаных з дзейнасьцю Каліноўскага і паўстанцаў 1863 году - у Свіслачы, Якушоўцы, Гародні, вёсцы Плябань на Вілейшчыне, і ўвогуле, дзе ёсць такая магчымасьць.

Калі патрэбна нейкая дапамога, парада ці хочаце ўзяць удзел у мерапрыемствах, кантактуйцеся з намі праз арганізацыйны e-mail Беларускай Нацыянальнай Памяці.

Дапаможам Сяргею Вітушку выдаць кнігу

2010-02-26T23:00:00.004+02:00

Сябры!

Заклікаем далучыцца да справы выданьня кнігі Сяргея Вітушкі, чалавека, які добра вядомы ўсёй беларускай сябрыне. Дастаткова ўзгадаць легендарную Талаку, дзе ён быў адным з лідэраў. Усё свае сілы і здольнасьці сп.Сяргей скіраваў на адраджэньне Беларусі! Больш падрабязна пра Сяргея Вітушку тут: http://kamunikat.org/8257.html

У выніку хваробы сп. Сяргей згубіў зрок. Але ён ня здаўся. Зараз падрыхтаваў кнігу казак, якая будзе цікавая як дзецям, так і дарослым.

Агульны кошт выданьня складае каля 4 тысяч эўра. Давайце Талакою дапаможам выдаць кнігу.

Грошы можна ахвяраваць на асабісты рахунак Сяргея Вітушкі:

Swedbank
GEDIMINO, 26 VILNIUS
LT52 7300 0100 0176 4423

Напісаць Сяргею Вітушку можна на адрас: talakoviec@tut.by

Беларуская Нацыянальная Памяць пачала збор сродкаў сярод беларусаў Польшчы. Пачатак быў пакладзены на беларускай дыктоўцы 21 лютага, сабрана 312 злотых. Учора, 25 лютага, два беларускіх студэнты з Беластоку перадалі на друк кнігі 80 злотых. На сёньня агулам маем 392 злотых.

Грошы можна пераслаць непасрэдна на рахунак, альбо перадаць праз БНП, калі Вы ў Польшчы.

Мы будзем падаваць суму сабраных ахвяраваньняў на нашай старонцы.

Гэтая кніга патрэбна Беларусі, усім нам і нашым дзецям!

Вынікі агульнабеларускай дыктоўкі ў Варшаве

2010-02-22T22:52:00.003+02:00

Абвяшчаем вынікі агульнабеларускай дыктоўкі, якая прайшла 21 лютага ў Варшаве.

Выказваем падзяку ўсім, хто прыняў удзел у напісаньні дыктоўкі. У гэтым годзе гэта быў урывак з прадмовы да кнігі Ўладзімера Караткевіча “Памяць зямлі беларускай”. Тэкст быў няпросты для напісаньня, але ўсе ўдзельнікі справіліся з задачай досыць пасьпяхова.

Найлепшымі сталі працы Сьвятланы Сьлесаравай, Луцэі Вішневіч і Антола Ляшчова.

Віншуем пераможцаў!

Прызы ад БНП будуць перададзеныя ў бліжэйшы час.

У Варшаве прайшла агульнабеларуская дыктоўка

2010-02-21T21:52:00.005+02:00

У Варшаве ўжо другі раз адбылася беларуская дыктоўка, якую арганізавала нашая супольнасьць Беларуская Нацыянальная Памяць. У гэтым годзе ў дыктоўцы прынялі ўдзел каля 40 чалавек.

На пачатку былі ўзгаданыя пераможцы мінулагодняй дыктоўкі, якія на вялікі жаль не змаглі прысутнічаць сёньня. Іх чакаюць падарункі ад БНП.

У мерапрыемстве прыняла ўдзел спн. Алена Анішэўская - знакамітая паэтэса беларускай нацыянальнай меншасьці ў Польшчы. Алена Анішэўская нарадзілася ў сёньняшняй Белавежы. З самага дзяцінства яна размаўляла на беларускай мове і лічыла яе роднай. Алена Анішэўская вядомая ня толькі сваёй творчасьцю, але й актыўнаю грамадзкаю дзейнасьцю, якая часта адлюстроўваецца ў яе творчасьці.

Пасьля дыктоўкі кіраўніком БНП А.Міхнаўцом быў агучаны зварот з просьбай падтрымаць выданьне кнігі Сяргея Вітушкі. Удзельнікі дыктоўкі далучыліся да збору сродкаў. Было сабрана 312 злотых. Больш падрабяная інфармацыя датычная збору ахвяраваньняў на кнігу Сяргея Вітушкі будзе ў бліжэйшыя дні.

Вынікі дыктоўкі будуць агучаныя заўтра. Пераможцы і ўдзельнікі атрымаюць прызы ад беларускага спадарожнікавага тэлеканалу БЕЛСАТ.

фоты Юліі Цяльпук

Агульнабеларуская дыктоўка ў Варшаве

2010-02-16T15:10:00.001+02:00

21 лютага ў міжнародны дзень роднай мовы а 12 гадзіне ў Collegium Civitas (Aula B, XII паверх., PKiN, pl. Defilad 1, Warszawa) адбудзецца агульнабеларуская дыктоўка.

У гэтым годзе ўжо трэці раз беларусы і прыхільнікі беларускай мовы ва ўсім сьвеце пішуць вялікую дыктоўку, галоўнай мэтай якой зьяўляецца папулярызацыя і падтрымка беларускай мовы.

"Беларуская Нацыянальная Памяць" запрашае ўсіх ахвотных прыняць удзел у гэтай важнай і ганаровай падзеі.

"Генэрал няскончанай вайны"

2010-02-14T12:02:00.004+02:00

12 лютага Беларуская Нацыянальная Памяць супольна з тэлеканалам БЕЛСАТ паказалі фільм "Генэрал няскончанай вайны", прысьвечаны Станіславу Булак-Балаховічу.

Перад паказам пра жыцьцё і дзейнасьць генэрала распавяла гісторык Анастасія Ільіна. На прэзентацыі фільма прысутнічаў унук генэрала Станіслаў-Мацей Булак-Балаховіч. Пасьля заканчэньня фільма адбылася дыскусія зь яго удзелам.

Усе прысутныя, якіх было каля 40 чалавек, атрымалі дыскі з фільмам і паштоўкі, прысьвечаныя Станіславу Булак-Балаховічу і іншым нацыянальным героям.

127 гадоў з дня нараджэньня Станіслава Булак-Балаховіча

2010-02-11T09:14:00.004+02:00

10 лютага сябры БНП наведалі сымбалічную магілу С. Булак-Балаховіча на Павонзскіх могілках у Варшаве. Пачысьцілі пахаваньне ад сьнегу і запалілі зьнічы памяці.

Вечная слава і памяць змагарам за волю Роднага Краю!

Успамін генэрала Булак-Балаховіча

2010-02-09T22:42:00.002+02:00

10 лютага спаўняецца 127 гадоў з дня нараджэньня генэрала Станіслава Булак-Балаховіча.

Заклікаем усіх беларусаў ушанаваць памяць славутага ваяра. У Беларусі шмат месцаў, якія зьвязаныя з жыцьцём і дзейнасьцю Станіслава Булак-Балаховіча. Ёсьць дом у Лужках, дзе ён жыў перад І сусьветнай вайной. У Берасьці знаходзяцца могілкі, дзе пахаваны жаўнеры ягонага войска. Берасьцейцамі там пастаўлены пастаўлены крыж і памятныя знакі. (мапа)

Гісторыя склалася так, што генэрал загінуў у 1940 годзе ад рук гестапа і магілы няма. Таму памяць пра яго мы ўшаноўваем у тых месцах, якія зьвязаныя з лёсам С. Булак-Балаховіча.

Беларуская Нацыянальная Памяць запрашае тых, хто знаходзіцца ў Варшаве, далучыцца да акцыі ўшанаваньня. Мерапрыемства адбудзецца заўтра, 10 лютага. Запалім зьнічы памяці каля памятнай шыльды побач з месцам яго гібелі, а таксама на сымбалічнай магіле генэрала.

Акрамя гэтага, “Беларуская нацыянальная памяць” і незалежны спадарожнікавы тэлеканал “Белсат” запрашаюць на прэм'ерны паказ дакументальнага фільму “Генэрал няскончанай вайны”.

Час і месца: 12 лютага, пятніца, у Collegium Civitas (аўдыторыя А, XII паверх, Pałac Kultury i Nauki, plac Defilad 1, Warszawa, уваход насупраць вул. Маршалкоўскай) а 18 гадзіне.

Лыжны прабег у гонар Кастуся Каліноўскага (фота)

2010-02-09T10:55:00.000+02:00

7 лютага Беларуская Нацыянальная Памяць правяла лыжны прабег у гонар Кастуся Каліноўскага. Шлях пралягаў праз родныя мясьціны нашага нацыянальнага героя.

Мэтай і канечным пунктам прабегу стала вёска Мастаўляны, дзе 2 лютага 1838 году нарадзіўся Кастусь Каліноўскі. Тут ён правёў першыя гады жыцьця. Шлях пачынаўся ад Баброўнікаў і склаў 7 км. Паколькі надвор'е спрыяла: лёгкі марозік і сонца - усе ўдзельнікі прабегу атрымалі шмат задавальненьня. Па дарозе да маршу далучыліся нашыя сябры са Зьвязу Беларускай Моладзі Ганна і Міхал.

У Мастаўлянах нас сустрэў добры знаёмы Уладзімір Канстанцінавіч Зарэцкі, які правёў да кутнага каменя сядзібы Каліноўскіх, па дарозе распавёўшы цікавосткі з жыцця сям'і Каліноўскіх у гэтых мясьцінах. Хвілінай маўчаньня прысутныя ўшанавалі памяць Кастуся Каліноўскага і ўсіх ваяроў, якія баранілі наш Край.

Развітаўшыся з Мастаўлянамі, рушылі ў бок Беластоку. Выехалі на трасу Баброўнікі-Беласток і разгарнулі бел-чырвона-белы сьцяг, што выклікала станоўчыя эмоцыі ў кіроўцаў, якія стаялі на мяжы.

Так прайшоў першы лыжны прабег у гонар Кастуся Каліноўскага. Спадзяемся, ён стане традыцыйным, і запрашаем усіх жадаючых на наступны прабег у будучым годзе.

Будзем ведаць, памятаць і ганарыцца сваёй гісторыяй!

Выказваем падзяку ўсім, хто нам дапамагаў у арганізацыі прабегу і асабіста сп. Аўгену Вапу, сп. Алегу Латышонку, Зьвязу Беларускай Моладзі і Радыё Рацыя.

У Польшчы прайшоў лыжны прабег у гонар Кастуся Каліноўскага

2010-02-08T17:52:00.005+02:00

Еўрарадыё

Лыжны прабег, прымеркаваны да 172-х угодкаў з дня нараджэння Кастуся Каліноўскага, кіраўніка нацыянальна-вызвольнага паўстання 1863 года ў Беларусі і Літве, прайшоў учора ў Польшчы. Прабег прайшоў з Баброўнікаў у Мастаўляны, дзе нарадзіўся і пражыў першыя гады жыцця Каліноўскі.

Акцыю арганізавала "Беларуская нацыянальная памяць". Пасля прабегу яго ўдзельнікі наведалі месца, дзе стаяў дом Каліноўскіх. Плануецца, што тут будзе ўсталяваны памятны знак у гонар кіраўніка паўстання. Жыхар вёскі Мастаўляны Ўладзімір Зарэцкі расказаў удзельнікам прабегу легенды, якія распавядалі ў вёсцы пра Кастуся Каліноўскага.

Лыжны прабег па мясьцінах Кастуся Каліноўскага

2010-02-05T10:25:00.004+02:00

Лыжны марш у гонар Кастуся Каліноўскага

2010-02-03T19:38:00.002+02:00

Крыніца: Радыё Рацыя

З Баброўнікаў у Мастаўляны на лыжах – такім чынам ушануюць памяць змагара “за нашу і вашу свабоду” Кастуся Каліноўскага студэнты з Варшавы.

Як паведаміў ініцыятар прабегу Анатоль Міхнавец, да ўдзелу ў лыжным маршы можа далучыцца кожны зацікаўлены.

- Беларуская Нацыянальная Памяць прапаноўвае ўсім беларусам, якія зараз знаходзяцца ў Польшчы на Беласточчыне, ушанаваць памяць нашага змагара, кіраўніка паўстання Кастуся Каліноўскага лыжным маршам. Прапануем 7 лютага сабрацца ў Беластоку каля рэдакцыі Радыё Рацыя (вул.Цепла 1), і потым паедзем да Баброўнікаў і адтуль зробім лыжны марш да вёскі Мастаўляны, дзе нарадзіўся Кастусь Каліноўскі. Заклікаем усіх, хто мае жаданне, мае лыжы, мае транспарт даехаць да Баброўнікаў, далучыцца да гэтай акцыі.

Лыжны прабег прымеркаваны да 172-х угодкаў з дня нараджэння Кастуся Каліноўскага, кіраўніка нацыянальна вызвольнага паўстання ў Беларусі. Беларуская Нацыянальная Памяць прапануе ўсім, каму дарагія каштоўнасці Кастуся Каліноўскага далучыцца да лыжнага прабегу па мясцінах нацыянальнага героя Беларусі.

Далучайцеся!

2010-01-30T10:04:00.003+02:00

Сябры!

Запрашаем Вас далучацца да інтэрнэт-акцыі “Перакладзем “Глобус Беларусі” на беларускую мову!”, ініцыяванай журналістам Глебам Лабадзенкам.

Пра акцыю чытайце тут

Беларусы Гданьска ўшанавалі памяць Лукаша Дзёкуця-Малея

2010-01-25T10:18:00.007+02:00

Беларусы Гданьска ўшанавалі памяць Лукаша Дзёкуця-Малея, запаліўшы на яго магіле зьнічы.

На здымку: Эльжбета Дзёкуць-Малей (унучка Л.Дзёкуця-Малея) і спн. Алена Глагоўская

Лукаш Дзёкуць-Малей (1.10.1988 - 20.01.1955) - адзін зь ініцыятараў стварэньня Грамады беларускай моладзі, празьбітар беларускіх баптыстаў і прапаведнік, перакладчык і выдавец Эвангельляў і рэлігійных тэкстаў на сучасную беларускую мову. Разам з Антонам Луцкевічам падрыхтаваў і выдаў накладам 25 тысячаў асобнікаў "Новы Запавет Госпада нашага Ісуса Хрыста і Псальмы". Гэта першае беларускамоўнае выданьне Новага Запавету і Псальмаў, якое мела два перавыданьні і якім вернікі розных канфесіяў карыстаюцца і сёньня.

Ушаноўваем памяць Міколы Чарнецкага

2010-01-22T12:05:00.004+02:00

19 студзеня 1944 памёр Мікола Чарнецкі, публіцыст, пэдагог і грамадзкі дзеяч.

Мікола Чарнецкі нарадзіўся на Гарадзеншчыне. Быў актывістам Грамады беларускай моладзі ў Гародні, з-за чаго пазьней вымушаны быў пакінуць родныя мясцьціны. Жыцьцёвая сьцяжына прывяла яго ў Прагу, дзе ён скончыў Пражскі ўніверсытэт са ступеньню доктара філязофіі. Зьяўляўся членам Беларускай партыі сацыялістаў-рэвалюцыянэраў, у 1923—1929 уваходзіў у Замежнае бюро БПСР у Празе. У 1929 вярнуўся ў Заходнюю Беларусь і працаваў настаўнікам беларускіх гімназіяў у Радашковічах і Клецку. У 1939 савецкія ўлады прызначылі яго дырэктарам школы ў в. Крынкі, з 1940 — кіраўніком асьветы Крынскага раёна. Арыштаваны НКУС, уцёк з-пад арышту. Падчас нямецкай акупацыі працаваў у Беларускім нацыянальным камітэце ў Беластоку. Па-зьверску забіты польскім падпольлем недалёка ад Беластоку.
Крыніца

Сябры БНП ушанавалі памяць Міколы Чарнецкага, запаліўшы зьнічы на яго магіле на Беласточчыне.

84 гады з дня нараджэньня Янкі Філістовіча

2010-01-14T07:00:00.001+02:00

14 студзеня споўнілася 84 гады з дня нараджэньня Янкі Філістовіча - змагара за вольную і незалежную Бацькаўшчыну.

Вечная слава і памяць героям!

Нарадзіўся Генадзь Сагановіч

2010-01-13T10:31:00.003+02:00

13 студзеня 1961 году нарадзіўся Генадзь Мікалаевіч Сагановіч, беларускі гісторык і археоляг. Аўтар кніг па гісторыі ВКЛ і Маскоўскай дзяржавы, у тым ліку кнігі "Невядомая вайна 1654 - 1667", у якой асьвятляюцца драматычныя падзеі адной з самых крывавых для Беларусі войнаў, якая доўгі час заставалася практычна невядомай нам.

Адзін з заснавальнікаў і старшыня Беларускага навукова-гуманітарнага таварыства, заснавальнік і галоўны рэдактар часопіса «Беларускі гістарычны агляд». У 1996 годзе ўзнагароджаны мэдалём Ф. Багушэвіча Беларускага ПЕН-цэнтра.

Віншуем шаноўнага Генадзя Мікалаевіча з народзінамі і зычым здароўя і плённай працы!

Фота з акцый ушанаваньня

2010-01-13T09:56:00.002+02:00

Каліноўцы на месцы пахаваньня Кастуся Каліноўскага на гары Гедыміна ў Вільні. Сьнежань 2009

Каліноўцы на месцы пахаваньня Язэпа Булак-Балаховіча ў Белавежы. Сьнежань 2009

Ствараецца Цэнтр беларускай культуры на Падляшшы

2009-12-10T21:52:00.003+02:00

Зьвяз беларускай моладзі ў Польшчы выкупіў пустуючы будынак былой школы ў Шчытах для беларускай справы. Плануецца адрамантаваць гэты мураваны будынак і стварыць у ім Цэнтр адукацыі і прамоцыі беларускай культуры "Шчыты".

Арганізатары зьвяртаюцца з заклікам да ўсіх, якім гэтая ініцыятыва не абыякавая і хто хоча дапамагчы, далучыцца да супрацоўніцтва падчас стварэньня гэтага Цэнтру. Патрэбныя будуць фінансавыя сродкі, будаўнічыя матэрыялы і людзі да працы. Больш інфармацыі можна знайсьці на старонцы Цэнтру ў сеціве www.szczyty.sonca.org, праца над якой яшчэ працягваецца. На ёй плануецца паведамляць аб тым, што ўжо зроблена і што плануецца рабіць у бліжэйшы час.

Для тых, хто б хацеў падтрымаць гэтую карысную для беларусаў ініцыятыву паведамляем нумар банкаўскага рахунку:

Związek Młodzieży Białoruskiej
ul. Lipowa 4 p. 221, 15-427 Białystok
Nr rachunku: 14 1020 1332 0000 1202 0027 1445
Bank PKO BP o/Bielsk Podlaski

Жыве Беларусь!

Святая Імша па-беларуску ў Варшаве

2009-11-26T09:06:00.001+02:00

Паважаныя Суайчыннікі, дарагія Браты і Сёстры ў Хрысце!

Вельмі сардэчна запрашаем ўсіх, хто хоча славіць БОГА на мове нашых продкаў, усіх, каму не абыякава родная мова і культура, хто любіць і шануе нашу БАЦЬКАЎШЧЫНУ – БЕЛАРУСЬ, на святую Эўхарыстыю 29.11.2009 г. на 15.00 у грэка-каталіцкую царкву Айцоў Бызыліянаў на вуліцу Мiodowa 16 ў Варшаве. Святая Імша будзе адраўлена ў лацінскім абрадзе. Пасля Эўхарыстыі запрашаем на спатканне пры гарбаце.

Прыходзьце і шукайце БОГА, шукайце сваёй тоеснасці, не забывайце пра БАЦЬКАЎШЧЫНУ!

Ад імя беларусаў у Варшаве
А. Сяргей Мацюшонак OFMCap

Прэзэнтацыя кнігі "Нацыянальнасьць - Беларус" у Варшаве

2009-11-20T09:05:00.003+02:00

18 лістапада ў Варшаве адбылося чарговае мерапрыемства, арганізаванае БНП.

Старшыня Беларускага Гістарычнага Таварыства ў Польшчы прафэсар Алег Латышонак прэзэнтаваў сваю апошнюю кнігу "Нацыянальнасьць - Беларус".

Прадмову да кніга можна прачытаць тут. Часопіс ARCHE пра кнігу

Зварот з нагоды ўгодкаў Слуцкага збройнага чыну

2009-11-18T20:23:00.001+02:00

Беларусы!

Яны змагаліся за свабоду сваю і Айчыны! Яны не чакалі ні ад каго дапамогі! Яны самыя вырашалі свой лёс! Яны паклалі свае жыцьці за Беларусь, за нас, за цябе!

Восемдзесят дзевяць гадоў таму, 27 лістапада 1920 году, распачаўся Слуцкі Збройны Чын. Нашы продкі выступілі на змаганне за сваю дзяржаву – Беларускую Народную Рэспубліку. У бой рушылі Слуцкі і Грозаўскі палкі Першай Слуцкай Брыгады Стралкоў БНР. Да іх далучыліся беларускія часткі арміі Генtрала Станіслава Булак-Балаховіча, якія раней біліся пад Мазыром - Беластоцкі батальён і Смаленскі полк, а таксама партызанскія атрады «Зялёнага Дуба».

Некалькі тысяч паўстанцаў на працягу месяца давалі адпор бальшавіцкай навале. Апошнія атрады сышлі з поля бітвы толькі ў студзені 1921 году. Партызанскія атрады прадаўжалі змаганьне яшчэ некалькі гадоў.

Свая Рэспубліка нараджалася ў крывавых муках, але наш беларускі родны дух, які тады ажыў, не згасаў. На поле бітвы ў след за случакамі выходзілі наступныя пакаленьні змагароў за Беларусь.

27 лістапада – іхны дзень: Дзень Герояў. Таму ў заклікаем усіх, хто носіць імя беларуса, годна сьвяткаваць гэты Дзень, успамінаць нашых Герояў і штогод ставіць у акне сьвечку. Няхай яе агенчык сігналіць Змагарам, што ў гэтай хаце помняць іх Чын.

Жыве Беларусь!

Алесь Краўцэвіч, Беларускае Гістарычнае Таварыства
Алег Латышонак, Беларускае Гістарычнае Таварыства ў Польшчы
Анатоль Міхнавец, Беларуская Нацыянальная Памяць

Фота з прэзентацыі фільму “Беларусь пад нямецкай акупацыяй 1941-1944”

2009-11-14T18:28:00.005+02:00

Відэа з канцэрта Андрэя Мельнікава ў Варшаве

2009-11-09T09:25:00.002+02:00

Успамінаем Вацлава Юстынавіча Ластоўскага

2009-11-08T10:30:00.000+02:00

8 лістапада 1883 году ў засьценку Калесьнікі Глыбоцкага раёну нарадзіўся Вацлаў Ластоўскі, палітык, выдавец, гісторык і літаратар. Цяжка пераацаніць ролю гэтага выбітнага чалавека для Беларусі.

Ён быў сакратаром рэдакцыі газэты “Наша Ніва“, выдаў першую “Кароткую гісторыю Беларусі“, пасьля быў рэдактарам газэты “Гоман“ і часопіса “Крывіч“, пісаў апавяданьні і аповесьці, апублікаваў “Падручны расейска-крыўскі (беларускі) слоўнік“ і фундамэнтальную “Гісторыю беларускай (крыўскай) кнігі», шмат перакладаў. І пры гэтым усім узначальваў урад БНР, за што пры паляках трапіў у турму, працаваў у міністэрстве беларускіх справаў у міжваеннай Літве, у Коўне. Адтуль перабраўся ў Менск, быў дырэктарам беларускага дзяржаўнага музэя. У 1937 годзе савецкія карныя ворганы выслалі Ластоўскага ў Саратаў і там расстралялі. Было яму на той момант 55 гадоў.

Можна толькі ўяўляць, чаго не пасьпеў зрабіць Ластоўскі - чалавек-акадэмія, генэратар ідэяў, надзелены талентам і неверагоднай працавітасьцю.

Дзяды ў Кракаве

2009-11-02T22:35:00.004+02:00

Учора прыхільнікі Беларускай Нацыянальнай Памяці ў Кракаве наведалі месца пахаваньня беларускага паэта Алеся Гаруна, аўтара славутага верша "Ты, мой брат, каго зваць беларусам..."

Сьвяткаваньне Дзядоў у Варшаве

2009-11-01T22:09:00.004+02:00

Сёньня на сьвята Дзядоў, калі мы ўзгадваем нашых продкаў, сябры БНП па традыцыі сабралі беларусаў Варшавы, каб ушанаваць магілы славутых землякоў.

Шмат беларускіх дзеячаў знайшлі спачын на варшаўскіх праваслаўных могілках на Волі, таму найперш шлях быў скіраваны туды. Узгадалі ўдзельніка беларускага нацыянальна-вызвольнага руху Янку Жамойціна ды ігумена Мітрафана Будзьку. Запаліўшы зьнічы, беларуская грамада памалілася за ўсіх памерлых праваслаўных беларусаў, пахаваных у Польшчы.

месца пахаваньня Янкі Жамойціна

месца пахаваньня Мітрафана Будзькі

Пазьней беларуская грамада скіравалася на Паванзкоўскія могілкі, дзе пахаваныя многія знакавыя для гісторыі Беларусі асобы, сярод якіх Марыя Ямант, Ян Булгак, Антон Пяткевіч (Адам Плуг), Тадэвуш Даленга-Мастовіч ды іншыя.

месца пахаваньня Яна Булгака

месца пахаваньня Антона Пяткевіча

Напрыканцы ўдзельнікі памаліліся за супакой душаў беларусаў-каталікоў, пахаваных на чужыне.

Без мінулага няма будучыні!

Дзяды ў Варшаве

2009-10-30T13:00:00.001+02:00

Беларуская Нацыянальная Памяць запрашае усіх беларусаў, якія знаходзяцца ў Польшчы, на дзень памяці продкаў — Дзяды.

У нядзелю, 1 лістапада, сустракаемся а 12й на пляцоўцы каля мэтро Centrum.

Наведаем магілы выбітных беларусаў, якія знайшлі спачын у Варшаве, запалім зьнічы, а гісторыкі распавядуць нам аб гэтых асобах.

Без мінулага няма будучыні! Чакаем вас!

Фота з прэзентацыі кнігі С. Дубаўца "Як?" у Варшаве

2009-10-27T11:28:00.000+02:00

Фота з канцэрта гурта Re1ikt у Варшаве

2009-10-27T11:27:00.000+02:00

Сьвіслач 2009

2009-10-19T21:15:00.006+03:00

25 кастрычніка ў Сьвіслачы адбудзецца штогадовая акцыя ўшанаваньня паўстанцаў 1863 году.

Пра мерапрыемства, якое ладзяць гарадзенскія грамадзкія актывісты, падрабязьней можна прачытаць тут.

Хто мае магчымасьць прысутнічаць на мерапрыемстве - прыязджайце!

Сябры! Пашырайце інфармацыю пра гэтаю акцыю!

Сустрэчы ў Сollegium Сivitas

2009-10-19T19:49:00.002+03:00

17 кастрычніка 2009 году ў Варшаве адбылася вечарына з удзелам беларускага барда Андрэя Мельнікава. Прысутныя пачулі і старыя, добра вядомыя хіты, і новыя песьні. Спадар Мельнікаў цытаваў урыўкі з кніг Зянона Пазьняка "Нацыянальныя каштоўнасьці" і Сяргея Дубаўца "Як?" і адгукаўся на іх сваімі песьнямі, уступаючы ў пэўным сэнсе ў дыялог з сучаснымі беларускімі мысьлярамі.

18 кастрычніка Беларуская Нацыянальная Памяць правяла сустрэчу зь Зянонам Пазьняком. Старшыня КХП-БНФ выступіў перад прысутнай беларускай грамадой з нагоды 21 угодкаў з дня стварэньня аргкамітэту Беларускага Народнага Фронту. Сустрэча доўжылася амаль тры гадзіны, пад час якіх сп. Пазьняк закрануў многія праблемы беларускай рэчаіснасьці, адказаў на пытаньні прысутных. Усе жадаючыя маглі набыць кніжкі яго аўтарства.

Сябры БНП падтрымоўваюць нашых спартоўцаў у Лёндане

2009-10-15T21:00:00.005+03:00

14 кастрычніка ў Лёндане на сусьветна вядомым стадыёне Ўэмблі (Wembley) адбыўся футбольны матч паміж зборнымі Ангельшчыны і Беларусі. Гледачоў на матчы было 79897 чалавек. У беларускім сэктары прысутнічала каля 200-230 заўзятараў.

Сябры БНП прывезлі ў Лёндан шмат нацыянальнай атрыбутыкі: сьцягоў, банэраў. На жаль, ангельскія ахоўнікі не дазволілі пранесьці на стадыён велізарны 10-мэтровы бел-чырвона-белы сьцяг. Але на матчы можна было ўбачыць некалькі нацыянальных сьцягоў сярэдняга памеру. Быў вывешаны банэр з "Пагоняй" і некалькі банэраў "Дынама-Менск" (клюбнага, бела-блакітнага колеру).

Беларусы, як маглі падтрымоўвалі сваіх, скандуючы: "Верым! Можам! Пераможам!" і "Беларусь - наперад!" Аднак, на вялікі жаль, нашая зборная саступіла зорным ангельцам з лікам 3:0

Але мы верым, - нашыя перамогі наперадзе!

БНП запрашае на сустрэчы

2009-10-15T10:23:00.002+03:00

У бліжэйшыя дні ў Варшаве адбудзецца некалькі мерапрыемстваў, якія арганізуе Беларуская Нацыянальная Памяць.

17 кастрычніка запрашаем на канцэрт папулярнага беларускага барда Андрэя Мельнікава. Пачатак а 16.30 аўд. B, Collegium Civitas, XII паверх PKiN.

18 кастрычніка, на ўгодкі стварэньня Беларускага Народнага Фронту - асноўнай незалежніцкай грамадзка-палітычнай сілы ў краіне, - адбудзецца сустрэча з легендарным Зянонам Пазьняком. Пачатак а 17.00 аўд. D, Collegium Civitas, XII паверх PKiN.

Успамін айца Яўгена Смаршчка

2009-10-08T21:22:00.002+03:00

У пачатку кастрычніка споўнілася 25 год з дня сьмерці выдатнага рэлігійнага і культурна-грамадзкага дзеяча беларускага замежжа Яўгена Смаршчка (Біяграфія).

Грамада Беларускай Нацыянальнай Памяці ў Флямандыі наведала днямі яго магілу пад Антвэрпэнам, каб ушанаваць памяць гэтага выдатнага беларуса.

Месца пахаваньня айца Яўгена Смаршчка

Фота з акцыі ў Варшаве з нагоды Аршанскай перамогі 1514 году

2009-09-09T20:28:00.001+03:00

шэсьце на Дзень беларускай вайсковай славы

Беларусы Варшавы адзначылі Дзень беларускай вайсковай славы

2009-09-09T19:41:00.002+03:00

Крыніца: Эўрарадыё

8 верасьня беларусы Варшавы адзначылі Дзень Беларускай Вайсковай Славы традыцыйным шэсьцем ад помнікa генерала дэ Голя да памятнай шыльды беларускаму генералу Станіславу Булак-Балаховічу.

Арганізатарам акцыі стала таварыства "Беларуская Нацыянальная Памяць", у мерапрыемстве прынялі актыўны ўдзел стыпендысты праграмы Кастуся Каліноўскага, што распачынаюць у гэтым годзе вучобу ў польскіх ВНУ.

Каля шыльды Балаховіча прысутныя ўшанавалі памяць усіх беларускіх ваяроў, што пад бел-чырвона-белым сцягам, як і ў 1514 годзе, змагаліся за незалежнасць Бацькаўшчыны.